លោក វីទីត ម៉ុនតាប៊ន អ្នករាយការណ៍ពិសេសស្តីពីសិទ្ធិមនុស្សនៅកម្ពុជាបានលាលែងពីមុខតំណែងហើយគិតចាប់ពីថ្ងៃទី២៤ ខែវិច្ឆិកា ឆ្នាំ២០២៥ តទៅ ។ នេះបើយោងតាមការបញ្ជាក់របស់លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា ក្នុងសេចក្តីជូនដំណឹងចុះថ្ងៃទី៦ ខែធ្នូ ឆ្នាំ២០២៥ ។
លោក វីទីត ម៉ុនតាប៊ន ជាជនជាតិថៃ និងជាសាស្ត្រាចារ្យផ្នែកច្បាប់នៅសាកលវិទ្យាល័យជូឡាឡុងកន ។ លោកត្រូវបានតែងតាំងជាអ្នករាយការណ៍ពិសេសស្តីពីសិទ្ធិមនុស្សនៅកម្ពុជាក្នុងឆ្នាំ ២០២១ ។ ក្នុងជម្លោះព្រំដែនកម្ពុជា-ថៃ លោក វីទីត ត្រូវកម្ពុជារិៈគន់ចំពោះការរក្សាភាពស្ងៀមស្ងាត់ផ្ទុយពីតួនាទីជាអ្នករាយការណ៍ ដោយមិនអើពើពីការរំលោភសិទ្ធិមនុស្ស និងច្បាប់អន្តរជាតិពីកងទ័ពថៃឡើយ ។ ៤ខែក្រោយជម្លោះ ទើបលោក វីទីត ចេញសេចក្តីថ្លែងការណ៍គាំទ្រសន្តិភាពរវាងកម្ពុជា-ថៃ ។
ទោះយ៉ាងណា លោក កែវ រ៉េមី បញ្ជាក់ថា កម្ពុជាមិនរើសអើងលោក វីទីត ទេ ដោយយោងថា ធនធានមនុស្សល្អៗជាច្រើននៅក្នុងប្រទេសថៃពិបាកនឹងបញ្ចេញចំណេះបម្រើប្រជាជាតិដោយសារភាពជ្រុលនិយមងុបងល់មួយចំនួន ៕
