ចិន៖ អ្នកនាំពាក្យក្រសួងការបរទេសចិន លោក លីន ជៀន (Lin Jian) បានអំពាវនាវឱ្យមានបទឈប់បាញ់ជាបន្ទាន់នៅក្នុងតំបន់មជ្ឈិមបូព៌ា ដោយសង្កត់ធ្ងន់ថាការដោះស្រាយជម្លោះតាមរយៈការចរចា និងការសន្ទនា គឺជាមធ្យោបាយដ៏ល្អបំផុតជាជាងការប្រើប្រាស់កម្លាំងយោធា ។
អ្នកនាំពាក្យរូបនេះ បានធ្វើការព្រមានដែរថា ប្រសិនបើសង្រ្គាមនេះនៅតែមិនបញ្ចប់ និងអូសបន្លាយជាបន្តទៀត នោះវានឹងបង្កផលប៉ះពាល់យ៉ាងធ្ងន់ធ្ងរដល់ស្ថិរភាពនៅក្នុងតំបន់ និងពិភពលោកទាំងមូលជាក់ជាពុំខានឡើយ ។
ការអំពាវនាវខាងលើនេះ ធ្វើឡើងបន្ទាប់ពីរដ្ឋមន្ត្រីការបរទេសចិន លោក Wang Yi បានពិភាក្សាតាមទូរសព្ទជាមួយសមភាគីអ៊ីរ៉ង់ ដើម្បីស្វែងរកច្រកចេញដើម្បីឆ្ពោះទៅរកសន្តិភាព ។
ទន្ទឹមនឹងនេះ មានសេចក្ដីរាយការណ៍ថា កប៉ាល់ដឹកឧស្ម័ន និងប្រេងមួយចំនួនរបស់ប្រទេសចិន នៅតែអាចធ្វើនាវាចរណ៍ឆ្លងកាត់ច្រកសមុទ្រហ័រមូស (Hormuz) បានជាធម្មតា បើទោះបីជាច្រកនេះត្រូវអ៊ីរ៉ង់ប្រកាសបិទចំពោះប្រទេសជាសត្រូវក៏ដោយ ដែលនេះបង្ហាញពីឥទ្ធិពលការទូតរបស់ចិននៅក្នុងតំបន់ ។
បន្ថែមពីលើបញ្ហាសង្រ្គាម ចិនក៏បានសម្តែងបំណងក្នុងការសហការជាមួយបណ្តាប្រទេសក្នុងតំបន់អាស៊ីអាគ្នេយ៍ ដើម្បីរួមគ្នាដោះស្រាយបញ្ហាសន្តិសុខថាមពល ដែលកំពុងរងការគំរាមកំហែងដោយសារតែវិបត្តិជម្លោះនៅតំបន់មជ្ឈិមបូព៌ា។ ចិនចាត់ទុកការរក្សាសុវត្ថិភាពផ្លូវដឹកជញ្ជូនតាមសមុទ្រ ថាជាផលប្រយោជន៍រួមរបស់អន្តរជាតិ ដែលគ្រប់ភាគីត្រូវតែចូលរួមថែរក្សាឱ្យបាន ។
ដោយឡែក ភាពតានតឹងរវាងចិន និងជប៉ុនបានផ្ទុះឡើង បន្ទាប់ពីមានហេតុការណ៍មន្ត្រីយោធាជប៉ុនម្នាក់កាន់កាំបិតសម្រុកចូលស្ថានទូតចិនក្នុងទីក្រុងតូក្យូ និងបានគំរាមសម្លាប់អ្នកការទូតចិន។ ប្រទេសចិនបានរិះគន់ធ្ងន់ៗលើការធ្វេសប្រហែសរបស់ជប៉ុនក្នុងការការពារទីតាំងស្ថានទូត និងបានទាមទារឱ្យមានការស៊ើបអង្កេតឱ្យបានហ្មត់ចត់បំផុតលើករណីដ៏គ្រោះថ្នាក់នេះ ៕
