អ៊ីរ៉ង់៖ ទីក្រុងតេហ៍រ៉ង់ បានធ្លាក់ចូលទៅក្នុងស្ថានភាពគ្រោះថ្នាក់ជាបន្តបន្ទាប់ ក្រោយការឆាបឆេះរោងចក្រចម្រាញ់ប្រេង និងឃ្លាំងផ្ទុកប្រេងធំៗចំនួន ៣កន្លែង បន្ទាប់ពីរងនូវការវាយប្រហារតាមអាកាសពីសំណាក់យោធាអ៊ីស្រាអ៊ែល និងអាម៉េរិក កាលពីចុងសប្ដាហ៍កន្លងទៅ។ ការវាយប្រហារនេះ បានបង្កឱ្យមានការខូចខាតយានយន្ត និងហេដ្ឋារចនាសម្ព័ន្ធយោធាយ៉ាងធ្ងន់ធ្ងរ ។
ជុំវិញផលប៉ះពាល់ផ្នែកបរិស្ថានឯណោះវិញ បញ្ហានេះ បានក្លាយជាក្ដីកង្វល់ថ្មីមួយទៀតសម្រាប់ប្រជាពលរដ្ឋនៅក្នុងទីក្រុងតេហ៍រ៉ង់ ដោយសារតែផ្សែងពុលបានបង្កឱ្យមានភ្លៀងអាស៊ីតពណ៌ខ្មៅ ដែលអាជ្ញាធរសុខាភិបាល បានអំពាវនាវឱ្យពលរដ្ឋស្នាក់នៅក្នុងផ្ទះ ដើម្បីជៀសវាងការប៉ះពាល់នឹងសារជាតិពុល ដែលសាយភាយចេញពីការឆាបឆេះប្រេងយ៉ាងសន្ធោសន្ធៅខាងលើ ។
ដោយឡែក កងទ័ពអ៊ីស្រាអ៊ែលអះអាងថា គោលដៅចម្បងនៃបេសកកម្មនេះ គឺដើម្បីបំផ្លាញប្រភពប្រេងឥន្ធនៈដែលផ្គត់ផ្គង់ដល់កងទ័ពអ៊ីរ៉ង់ ដែលជាយុទ្ធសាស្ត្រមួយក្នុងការធ្វើឱ្យកម្លាំងយោធារបស់អ៊ីរ៉ង់ចុះខ្សោយ។ ចំណែកខាងអ៊ីរ៉ង់វិញ ក៏បានទទួលស្គាល់ថាទីតាំងយុទ្ធសាស្ត្រប្រេងសំខាន់ៗពិតជាត្រូវបានវាយប្រហារដោយមីស៊ីលយ៉ាងពិតប្រាកដមែន ។
ជម្លោះនេះ បានហក់ឡើងដល់កម្រិតកំពូល បន្ទាប់ពីការស្លាប់របស់មេដឹកនាំកំពូលអ៊ីរ៉ង់ លោក អាយ៉ាតុលា អាលី ខាមីនី នៅក្នុងប្រតិបត្តិការរួមគ្នារបស់អាម៉េរិក និងអ៊ីស្រាអ៊ែល។ ស្ថានការណ៍បច្ចុប្បន្នកំពុងស្ថិតក្នុងភាពវឹកវរ ខណៈដែលអ៊ីរ៉ង់ចាប់ផ្តើមវាយបកសងសឹកវិញ ដែលធ្វើឱ្យតំបន់មជ្ឈិមបូព៌ាទាំងមូលស្ថិតក្នុងហានិភ័យនៃសង្គ្រាមទ្រង់ទ្រាយធំ ៕
