ខ្ញុំមេធាវី ម៉ុត សៀងហៃ អត្តលេខៈ ២៤០៧ ជាសមាជិកគណៈមេធាវីនៃព្រះរាជាណាចក្រកម្ពុជា និងជា មេធាវីនៃ ក្រុមមេធាវីច្បាប់ និងពិគ្រោះយោបល់ មានការិយាល័យផ្ទះលេខ៨V ផ្លូវលេខ៣៥៤ (បុរីវិមានភ្នំពេញ) សង្កាត់ច្រាំងចំរេះទី២ ខណ្ឌឬស្សីកែវ រាជធានីភ្នំពេញ ទំនាក់ទំនងតាមទូរស័ព្ទលេខៈ ០៦០ ៩៩៩៩ ០៦/០៩៦ ២៥ ០០០ ២៥ ជាមេធាវីតំណាងដោយអាណត្តិជូន ឯកឧត្តម សេង ទៀង នាយករងខុទ្ទកាល័យសម្តេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជា ។
សូមជម្រាបមក
បុគ្គលឈ្មោះ ប៉ូ ឡូ ឬ លោក ស្រី ប៉ូឡូ ចាងហ្វាងកាសែត RFN NEWS និងប្រជាសាធារណៈជន
កម្មវត្ថុ៖ ករណីក្លែងបន្លំ និងយកឈ្មោះ ឯកឧត្តម សេង ទៀង ទៅអួតអាងជាថ្នូរទៅនឹងការយកទឹកប្រាក់ចំនួន ៣០០០$ (បីពាន់ដុល្លារអាមេរិក) ពីប្រជាពលរដ្ឋចំនួន០៨គ្រួសារ លើករណីរឿងបញ្ហាដីធ្លី នៅភូមិទី២ ឃុំ ត្រែងត្រយឹង ស្រុកភ្នំស្រួច ខេត្តកំពង់ស្ពឺ ។
យោង៖ – ប្រភពព័ត៌មានផ្សព្វផ្សាយ តាមបណ្តឹងរបស់ប្រជាពលរដ្ឋ ០៨គ្រួសារ
– សេចក្តីប្រកាសច្រានចោល តាមរយៈការចុះផ្សាយនៅអង្គភាពព័ត៌មាន Fresh News
សេចក្តីដូចមានក្នុងកម្មវត្ថុ និងយោងខាងលើ ខ្ញុំជាមេធាវីតំណាងដោយអាណត្តិជូន ឯកឧត្តម សេង ទៀង សូមជម្រាបជូនមក បុគ្គលឈ្មោះ ប៉ូឡូ ឬ លោក ស្រី ប៉ូឡូ អោយបានជ្រាបថា ៖ ករណីរឿងរត់ការដោះស្រាយ ឬ ការបោកប្រាស់ ការយកប្រាក់ និងការមានទំនាក់ទំនងផ្សេងៗរបស់លោក ជាមួយនឹងប្រជាពលរដ្ឋចំនួន០៨គ្រួសារ ដែលរស់នៅភូមិឃុំខាងលើ គឺជារឿងរបស់លោក គឺពុំជាប់ពាក់ព័ន្ធអ្វីនឹង ឯកឧត្តម សេង ទៀង សូម្បីបន្តិចឡើយ។ ទោះបី លោក មានចេតនា ឬ អចេតនា ដោយប្រយោល និងមិនប្រយោល ដែលមានគោលបំណងដើម្បីចង់បានលាភសក្ការៈអ្វីមួយតាមគោលដៅចង់បាន របស់លោកក៏ដោយ ក៏លោកមិនត្រូវមានចេតនា ឬ អចេតនាបែបទុច្ចរិតអាក្រក់យកឈ្មោះថ្នាក់ដឹកនាំមកលាបពណ៍ មូល បង្កាច់បង្អួចកត្តិយស សេចក្តីថ្លៃថ្នូររបស់ ឯកឧត្តម សេង ទៀង នោះដែរ ។ ផ្ទុយទៅវិញ ឯកឧត្តម សេង ទៀង គឺធ្វើ តែបុណ្យ និងតែងតែជួយទៅដល់ប្រជាពលរដ្ឋក្រីក្រកម្ពុជា គ្រប់រូបដែលជួបការទុក្ខលំបាក និងជីវភាពខ្វះខាត ស្របតាម ប្រសាសន៍ណែនាំ និងការដឹកនាំដ៏ខ្ពង់ខ្ពស់ របស់ថ្នាក់ដឹកនាំកំពូល នៃរាជរដ្ឋាភិបាលកម្ពុជា ។
ខ្ញុំសូមព្រមាន និងថ្កោលទោស ជាសាធារណៈចំពោះទង្វើទុច្ចរិតរបស់ “បុគ្គលឈ្មោះ ប៉ូ ឡូ ឬ លោក ស្រី ប៉ូឡូ ចាងហ្វាងកាសែត RFN NEWS និងសូមសាធារណៈជនបានទទួលជ្រាបជាព័ត៌មាន ហើយសូមកុំមានការយល់ច្រឡំ ជឿតាម ការលើកឡើងមូលបង្កាច់យកឈ្មោះ បង្អួចកត្តិយស ដោយគ្មានមូលដ្ឋានរបស់បុគ្គលអគតិឈ្មោះ ប៉ូឡូ ឬ លោក ស្រី ប៉ូឡូ នេះ។
ទន្ទឹមនឹងនេះ ឯកឧត្តម ក៏បានច្រានចោល គឺមិនស្គាល់បុគ្គលនេះឡើយ និងស្នើសុំអាជ្ញាធរមានសមត្ថកិច្ចជួយ ស្វែងរកបុគ្គលនេះ ដើម្បីចាត់វិធានការតាមផ្លូវច្បាប់ បើបានប្រព្រឹត្តដូចការចោទប្រកាន់ពីប្រជាពលរដ្ឋមែន ហើយ ឯកឧត្តម ក៏អំពាវនាវទៅដល់ប្រជាពលរដ្ឋទូទៅ សូមកុំជឿអោយសោះ ចំពោះរាល់បុគ្គលណា ដែលធានាអះអាងថាបានស្គាល់រូបលោក យកឈ្មោះលោកទៅប្រើ ដើម្បីរត់ការដោះស្រាយបញ្ហាជម្លោះដីធ្លី ឬ បញ្ហាជម្លោះផ្សេងៗ ទៀត ព្រោះរូបលោក ពុំមានតួនាទី ឬ ភារកិច្ចអ្វីទៅអន្តរាគមន៍លើវិវាទផ្សេងៗនានា នោះឡើយ ។
អាស្រ័យដូចបានជម្រាបជូនខាងលើ សូម សាធារណៈជនទូទៅ ទទួលជ្រាបជាព័ត៌មាន៕ដោយ៖ សិរី នាគ
