សាលាដំបូងខេត្តស្វាយរៀងសម្រេចខ្លួនជាបណ្តោះអាសន្នចំពោះជនជាតិចិន ២៧នាក់ ក្នុងសំណុំរឿង សមគំនិត និងឆបោកតាមអនឡាញ ប៉ះពាល់ដល់បូរណភាពនៃសាកសព និងប្រើប្រាស់គ្រឿងញៀន ប្រព្រឹត្តនៅភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង។
តាមរយៈសេចក្តីប្រកាសព័ត៌មានដែលផ្សព្វផ្សាយនៅថ្ងៃទី២៣ ខែកុម្ភៈនេះ ស្តីបទល្មើសនេះប្រព្រឹត្តនៅភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង កាលពីថ្ងៃទី១០ ខែកុម្ភៈ ឆ្នាំ២០២៦ ហើយត្រូវបានបញ្ជូនមកដល់សាលាដំបូងខេត្តស្វាយរៀង នៅថ្ងៃទី១៥ ខែកុម្ភៈ។
ក្រោយសាកសួរចម្លើយ និងពិនិត្យភស្តុតាងរួចមក ចៅក្រមស៊ើបសួរបានសម្រេចឃុំខ្លួន ជាបណ្តោះអាសន្នលើជនត្រូវចោទជាជនជាតិចិនចំនួន២៧នាក់ និងបន្តស្វែងរកចាប់ខ្លួនជនជាតិចិនចំនួន២នាក់ទៀតដែលកំពុងរត់គេចខ្លួន។
យោងតាមសមត្ថកិច្ច កាលពីថ្ងៃទី១០ ខែកុម្ភៈ ឆ្នាំ២០២៦ ប៉ុស្ដិ៍នគរបាលរដ្ឋបាលបាវិត បានទទួលព័ត៌មានពីប្រជាពលរដ្ឋ ក្រោយប្រទះឃើញសាកសពមានសភាពរុំដោយថង់ផ្លាសស្ទិច ពណ៌ខ្មៅ ត្រូវបានគេយកមកប្លុងចោលនៅលើផ្លូវលំ ស្ថិតក្នុងភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង។
ក្រោយទទួលព័ត៌មាន កម្លាំងជំនាញនៃស្នងការនគរបាលខេត្តស្វាយរៀង បានចុះធ្វើការស្រាវជ្រាវ និងបានកំណត់ទីតាំង រហូតឈានដល់បង្រ្កាបបានមុខសញ្ញាដែលដឹកសពទៅទម្លាក់ចោល ជាមួយមធ្យោបាយរថយន្ត១គ្រឿង នៅទីតាំងផ្ទះវីឡាមួយកន្លែង។
ក្នុងប្រតិបត្តិការនោះកម្លាំងសមត្ថកិច្ចជំនាញបានរកឃើញជនសង្ស័យពាក់ពន្ធ័ករណីឆបោកតាមប្រព័ន្ធ អនឡាញចំនួន២៦នាក់ (ស្រី១នាក់) ដែលសុទ្ធតែជាជនជាតិចិន និងវត្ថុតាងកុំព្យូទ័រចំនួន៨គ្រឿង ព្រមទាំងមានតម្រុយពាក់ព័ន្ធនឹងសាកសព៕
