អាស៊ាន៖ តាមរយៈប្រភពជាច្រើន ដោយគិតត្រឹមថ្ងៃទី២២ ខែមករា ឆ្នាំ ២០២៦នេះ មានប្រទេសចំនួន ៦ហើយនៅក្នុងតំបន់អាស៊ានដែលទទួលបានការអញ្ជើញឱ្យចូលរួមជាសមាជិកនៅក្នុងក្រុមប្រឹក្សាសន្តិភាព ឬ Board of Peace ដែលផ្តួចផ្ដើមឡើងដោយប្រធានាធិបតីអាម៉េរិក លោក ដូណាល់ ត្រាំ ។
នៅក្នុងចំណោមប្រទេសអាស៊ានដែលទទួលបានការអញ្ជើញ រួមមាន វៀតណាម, ឥណ្ឌូណេស៊ី, សិង្ហបុរី, ម៉ាឡេស៊ី, ថៃឡង់ដ៍ និងកម្ពុជា។ ក្នុងនោះ មានប្រទេសខ្លះយល់ព្រមក្នុងការចូលរួមរួចហើយ ខណៈប្រទេសខ្លះទៀតកំពុងតែស្ថិតនៅក្នុងដំណាក់កាលពិភាក្សានិងវាយតម្លៃ ។
ដោយឡែក ប្រទេសសមាជិកអាស៊ានដែលនៅសេសសល់ផ្សេងទៀត នៅមិនទាន់ទទួលបានការអញ្ជើញឱ្យចូលរួមនៅក្នុងក្រុមប្រឹក្សាសន្តិភាពនៅឡើយទេ ដែលបណ្ដាប្រទេសទាំងនោះ ទំនងជានឹងទទួលបានការអញ្ជើញណាមួយនៅពេលខាងមុខ ។
ដំបូងឡើយ លោកត្រាំ បង្កើតក្រុមប្រឹក្សាសន្តិភាពឡើងមក ក្រោមគោលបំណងដើម្បីបញ្ចប់សង្គ្រាមនៅតំបន់ហ្គាហ្សា (Gaza) តែប៉ុណ្ណោះ ក៏ប៉ុន្តែនៅពេលក្រោយមកទៀត លោកចង់ឱ្យក្រុមនេះជួយដោះស្រាយជម្លោះនៅទូទាំងពិភពលោកតែម្ដង ។
គួររំឭកថា គ្រប់ប្រទេសដែលចូលរួមនៅក្នុងក្រុមប្រឹក្សានេះ នឹងមានអាណត្តិក្នុងរយៈពេល ៣ឆ្នាំ ប៉ុន្តែ ប្រសិនបើពួកគេចង់មានសមាជិកភាពលើសពី៣ឆ្នាំ ប្រទេសទាំងនោះត្រូវបង់ទឹកប្រាក់ចំនួន ១ពាន់លានដុល្លារអាម៉េរិកចូលទៅក្នុងមូលនិធិ ៕
