កោះកុង៖ អង្គភាពប្រឆាំងអំពើពុករលួយ (ACU) នៅថ្ងៃទី ២៩ មីនា បានប្រកាសបង្ហាញព័ត៌មានលម្អិតជាមួយ Fresh News អំពីប្រតិបត្តិការស្រាវជ្រាវរហូតឈានដល់ការចាប់ខ្លួន អនុប្រធានសាខាគយខេត្តកោះកុង និងបក្ខពួក។ក្នុងលទ្ធផលស្រាវជ្រាវនោះ ACU បានរកឃើញលុយពុករលួយជាង១លានដុល្លារ ក្នុងគណនី ៤១ នៅធនាគារចំនួន ៦ ដោយក្នុងនោះមានប្រើទាំងគណនីរបស់ប្អូនកូនប្រុសស្រី និង ប្រពន្ធក្រៅច្បាប់ទី៧ផង។
អនុប្រធានសាខាគយខេត្តកោះកុង ដែល ACU បានចាប់ខ្លួន គឺមានឈ្មោះ ម៉ៅ សាន់សូនា ធ្លាប់រស់នៅក្នុងប្រទេសថៃ ហើយទទួលបានការសិក្សារៀនសូត្រនៅវិទ្យាល័យនៅទីនោះ ហើយនៅឆ្នាំ ១៩៩១ លោកបានវិលចូលប្រទេសកម្ពុជា រហូតទទួលបានការងារជាមន្ត្រីគយជាច្រើនខេត្ត ក្នុងប្រទេសកម្ពុជា ហើយនៅឆ្នាំ២០២៤ លោកត្រូវបានតែងតាំងជាអនុប្រធានសាខាគយខេត្តកោះកុង។
យោងតាមការស្រាវជ្រាវលម្អិតពីក្រុមជំនាញរបស់ ACU បានរកឃើញថា បុគ្គល ម៉ៅ សាន់សូនា បានក្លែងបន្លំឯកសារប្តូរឈ្មោះ និង ខែឆ្នាំកំណើតជាច្រើន ជាមួយគណនីធនាគារ ៤១ គណនី នៅធនាគារចំនួន ៦ក្នុងប្រទេសកម្ពុជាដោយប្រើប្រាស់ជាមួយសាច់ញាតិ បងប្អូន ក្រុមគ្រួសារខ្លួន និង បានរកឃើញប្រព្រឹត្តិអំពើពុករលួយជាច្រើនករណីក្នុងប្រទេសកម្ពុជាដូចជា៖ការបើកដៃឱ្យនាំចូល ទូរសព្ទដៃ និងកំព្យូទ័រ ដោយខុសច្បាប់ចូលប្រទេសកម្ពុជា ដោយសហការគ្នាជាមួយក្រុមចិន Online Scam, ការទារប្រាក់ពីអ្នកបើកបររថយន្ត និងម្ចាស់ឡានដឹកទំនិញ ៨២៩ គ្រឿង ស្នើនឹង៣ពាន់ក្បាលឡាន,ការក្លែងបន្លំគណនីធនាគារ ដោយប្រើប្រាស់គណនីរបស់កូនប្រុស គណនីរបស់កូនស្រីបង្កើត និង គូដណ្តឹង គណនីរបស់ប្រពន្ធក្រៅច្បាប់ទី ៧ ដើម្បីទារប្រាក់ខុសច្បាប់ពីអ្នកបើកបររថយន្ត និង ម្ចាស់ទំនិញ និងការសូកប៉ាន់ទៅមន្ត្រី និងអ្នកសារព័ត៌មាន ដើម្បីជួយបិទបាំងរឿងក្តីក្តាំរបស់ខ្លួនជាដើម។
ក្រៅពីរកឃើញអំពើពុករលួយរបស់អនុប្រធានគយកោះកុង ក្រុមជំនាញ ACU ក៏បានរកឃើញមន្ត្រីរបស់ខ្លួនចំនួន២នាក់ និងជំនួយការមេធាវីម្នាក់ ជាប់ពាក់ព័ន្ធជាមួយបុគ្គល ម៉ៅ សាន់សូនា ហើយបានរៀបចំឯកសារបញ្ជូនទៅតុលាការរួចរាល់។ចំពោះទ្រព្យសម្បត្តិ សម្ភារមានតម្លៃ ជាច្រើន ត្រូវបាន ACU សម្រេចរឹបអូសមកវិញរក្សាទុកជាសម្បត្តិរដ្ឋ ព្រមទាំងបង្កកគណនីធានាគារចំនួន១៥ របស់ឈ្មោះ ម៉ៅ សាន់សូនា ក្នុងទំហំទឹកប្រាក់យ៉ាងតិចមិនក្រោម ១លានដុល្លារ៕
