នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា បានអំពាវនាវដល់ថ្នាក់ដឹកនាំ នាយទាហាន និងពលទាហាននៃកងយោធពលខេមរភូមិន្ទទាំងអស់ ត្រូវតែជាកម្លាំងមានឧត្តមគតិស្មោះត្រង់ដាច់ខាតចំពោះជាតិមាតុភូមិ ចំពោះរាជរដ្ឋាភិបាល និងមានសមត្ថភាពគ្រប់គ្រាន់ក្នុងការពារឯករាជជាតិ អធិបតេយ្យទឹកដីនៃព្រះរាជាណាចក្រកម្ពុជា ការពារសន្តិភាព និងបន្តប្រពៃណីសាមគ្គី ឯកភាពជាធ្លុងមួយ ក្នុងការបំពេញភារកិច្ច ដែលរាជរដ្ឋាភិបាលបានប្រគល់ជូន។
ការក្រើនរំលឹកជាថ្មីដល់នាយទាហាន នាយទាហានរង ពលទាហាននៃកងយោធពលខេមរភូមិន្ទ នេះគឺបានធ្វើឡើងនៅក្នុងឱកាសអញ្ជើញ ជាអធិបតីក្នុងពិធី បិទវគ្គបណ្តុះបណ្តាល ហ្វឹកហ្វឺន និងបំប៉ន ឆ្នាំសិក្សា២០២៥-២០២៦ និងបន្តបើកវគ្គបណ្តុះបណ្តាល ហ្វឹកហ្វឺន និងបំប៉ន ឆ្នាំសិក្សា២០២៦-២០២៧ របស់សាកលវិទ្យាល័យការពារជាតិ នាព្រឹកថ្ងៃទី២០ ខែមេសា ឆ្នាំ២០២៦នេះ។
ក្នុងឱកាសនេះដែរនាយឧត្តមសេនីយ៍ ទៀ សីហា បានថ្លែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ សាស្ត្រាចារ្យ យោធាចារ្យ បុគ្គលិកសិក្សា នាយទាហាន ពលទាហាន នៃសាកលវិទ្យាល័យការពារជាតិ ដែលបានអនុវត្តភារកិច្ច ស័ក្តិសមជាគ្រឹះស្ថានឧត្តមសិក្សារបស់ក្រសួងការពារជាតិ នៃ ខ.ភ.ម ដែលបានដើរតួនាទីយ៉ាងសំខាន់លើការងារបណ្តុះបណ្តាលធនធានមនុស្ស ការអភិវឌ្ឍសមត្ថភាពកងទ័ពទាំងខាងចំណេះដឹងទូទៅ ស្មារតី ឆន្ទៈ មនសិការស្នេហាជាតិ ជំរុញដល់ការឈានចូលនិងទទួលយកបដិវត្តកម្មឌីជីថល ដើម្បីឆ្លើយតបទៅនឹងភាពជឿនលឿននៃបច្ចេកវិទ្យា វិទ្យសាស្ត្រសម័យទំនើប នវានុវត្តន៍យោធានៅក្នុងតំបន់ និងសកលលោក ដើម្បីធានាចីរភាពនៃការអភិវឌ្ឍក្នុងវិស័យការពារជាតិ។
ឆ្លៀតក្នុងឱកាសនោះ ឯកឧត្តម ឧបនាយករដ្ឋមន្ត្រី ក៏បានគោរពអរគុណដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានផ្តល់នូវសមិទ្ធផលជាច្រើនជាពិសេសការយកចិត្តទុកដាក់ ដ៏ខ្ពង់ខ្ពស់ពី សម្តេចអគ្គមហាសេនាបតីតេជោ និងសម្តេចកិត្តិព្រឹទ្ធបណ្ឌិត និងសូមអរគុណ ថ្នាក់ដឹកនាំក្រសួងស្ថាប័នរដ្ឋ និងឯកជន បណ្តាសេនានុព័ន្ធ អនុព័ន្ធយោធានានា ដែលបានបរិច្ចាគនូវ ធនធាន និងសម្ភារៈជួយដល់សាកលវិទ្យាល័យការពារជាតិរបស់យើង។ ទាំងនេះគឺជាការអភិវឌ្ឍហេដ្ឋារចនាសម្ព័ន្ធដែលជាផ្នែកមួយនៃផែនការរបស់រាជរដ្ឋាភិបាល ក្នុងការបណ្តុះបណ្តាលមូលធនមនុស្ស ដើម្បីបុព្វហេតុការពារបូរណភាពទឹកដីនៃមាតុភូមិរបស់យើង និងកិច្ចសហប្រតិបត្តការជាលក្ខណៈអន្តរជាតិ ដើម្បីចូលរួមថែរក្សាសន្តិភាព។
ឯកឧត្តមបានបញ្ជាក់ថា ជាការពិតណាស់សាកលវិទ្យាល័យការពារជាតិ គឺជាគ្រឹះស្ថានឧត្តមសិក្សារបស់ក្រសួងការពារជាតិ ដែលបានបណ្តុះបណ្តាលនាយទាហានជាន់ខ្ពស់ នាយទាហាន ក្នុងវិស័យការពារជាតិ ដោយផ្តោតជាសំខាន់ លើជំនាញឯកទេស វិទ្យាសាស្ត្រយោធា វិទ្យាសាស្ត្រសង្គម វិទ្យាសាស្ត្រពិត ភាសាជាតិ និងអន្តរជាតិ។ ព្រោះថាវិស័យយោធាបច្ចុប្បន្ន ទាំងក្នុងតំបន់ និងសកលលោក មានការវិវត្តស្មុគស្មាញឥតឈប់ឈរ ដែលអាចជះឥទ្ធិពលដល់វិស័យការពារជាតិ នៃព្រះរាជាណាចក្រកម្ពុជា ចំពោះការប្រែប្រួលទាំងនេះបានតម្រូវ ឱ្យមានការគិតគូរម៉ត់ចត់អំពីចក្ខុវិស័យយុទ្ធសាស្រ្តការពារជាតិ៕
