ខេត្តព្រៃវែង៖ នាព្រឹកថ្ងៃសៅរ៍ ទី១ ខែសីហា ឆ្នាំ២០២៦ វេលាម៉ោង ០៨:០០នាទីព្រឹក នៅស្នាក់ការគណបក្សប្រជាជនកម្ពុជា ឃុំព្រាល ស្រុកកញ្ជ្រៀច ខេត្តព្រៃវែង បានរៀបចំពិធីប្រកាសកែសម្រួល និងបំពេញបន្ថែមសមាសភាពក្រុមការងារគណបក្សចុះមូលដ្ឋានឃុំព្រាល ស្រុកកញ្ជ្រៀច ខេត្តព្រៃវែង ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ឡោ ម៉េងហួត ប្រធានក្រុមការងារគណបក្សចុះមូលដ្ឋានឃុំព្រាល។
អញ្ជើញចូលរួមក្នុងពិធីនេះ រួមមាន៖
លោក នាង មន្និន សមាជិកអចិន្ត្រៃយ៍គណបក្សស្រុក និងសហការី។
លោក សុត សម្បត្តិ ប្រធានគណៈកម្មាធិការគណបក្សឃុំព្រាល។
លោក លោកស្រី អនុប្រធានក្រុមការងារគណបក្សចុះមូលដ្ឋានឃុំ។
លោក លោកស្រី ប្រធាន និងអនុប្រធានក្រុមការងារចំណុះទាំង ៤ នៃក្រុមការងារគណបក្សចុះមូលដ្ឋានឃុំ។
លោក លោកស្រី ប្រធាន និងអនុប្រធានក្រុមការងារគណបក្សចុះមូលដ្ឋានភូមិទាំង ១៦ ភូមិ។
លោក លោកស្រី សមាជិកអចិន្ត្រៃយ៍គណៈកម្មាធិការគណបក្សឃុំ។
លោក លោកស្រី គណៈកម្មាធិការសាខាគណបក្សភូមិទាំង ១៦ ភូមិ។
ពិធីនេះមានអ្នកចូលរួមសរុបចំនួន ១៥២នាក់ ក្នុងនោះស្រី ២៣នាក់ ដោយបានប្រព្រឹត្តទៅក្នុងបរិយាកាសអធិកអធម សាមគ្គីភាព ភាពកក់ក្តៅ និងការទទួលខុសត្រូវខ្ពស់។
ការប្រកាសកែសម្រួល និងបំពេញបន្ថែមសមាសភាពក្រុមការងារនាពេលនេះ មានគោលបំណងពង្រឹងរចនាសម្ព័ន្ធដឹកនាំ បង្កើនប្រសិទ្ធភាពការអនុវត្តភារកិច្ច និងជំរុញការចុះជាប់ជាប្រចាំជាមួយប្រជាពលរដ្ឋនៅតាមមូលដ្ឋាន ស្របតាមគោលនយោបាយ និងទិសដៅរបស់គណបក្សប្រជាជនកម្ពុជា ដើម្បីធានាឱ្យការបម្រើប្រជាពលរដ្ឋកាន់តែមានប្រសិទ្ធភាព ឆ្លើយតបទាន់ពេលវេលាចំពោះសំណូមពរ និងតម្រូវការជាក់ស្តែងរបស់ប្រជាពលរដ្ឋ។
ក្នុងឱកាសនោះ ឯកឧត្តម ឡោ ម៉េងហួត បានថ្លែងកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារគ្រប់លំដាប់ថ្នាក់ ដែលបានរួមចំណែកយ៉ាងសកម្មក្នុងការពង្រឹងមូលដ្ឋានគណបក្ស បម្រើប្រជាពលរដ្ឋ និងអនុវត្តភារកិច្ចប្រកបដោយស្មារតីទទួលខុសត្រូវខ្ពស់។ ឯកឧត្តមក៏បានជំរុញឱ្យសមាជិក សមាជិកាគណបក្ស និងក្រុមការងារទាំងអស់ បន្តពង្រឹងសាមគ្គីភាព ឯកភាពផ្ទៃក្នុង លើកកម្ពស់សីលធម៌ ភាពស្មោះត្រង់ តម្លាភាព និងប្រសិទ្ធភាពការងារ ដើម្បីឆ្លើយតបនឹងការរំពឹងទុករបស់ប្រជាពលរដ្ឋ។
ជាមួយគ្នានេះ ឯកឧត្តម ឡោ ម៉េងហួត បានមានប្រសាសន៍ផ្តាំផ្ញើថា៖«នៅពេលចុះជួបសំណេះសំណាលជាមួយប្រជាពលរដ្ឋតាមខ្នងផ្ទះ សូមបំពេញតួនាទីជាអ្នកបម្រើប្រជាពលរដ្ឋដោយស្មោះត្រង់ ស្តាប់បញ្ហា ស្វែងយល់ពីតម្រូវការជាក់ស្តែង និងពន្យល់អំពីសមិទ្ធផល ក៏ដូចជាគោលនយោបាយរបស់គណបក្សប្រជាជនកម្ពុជា ដោយភាពសុភាពរាបសារ និងស្និទ្ធស្នាល។ អ្វីដែលខ្ញុំសូមតែមួយគត់ គឺសូមឱ្យបងប្អូនប្រជាពលរដ្ឋបន្តជឿជាក់ និងបោះឆ្នោតគាំទ្រគណបក្សប្រជាជនកម្ពុជា ដើម្បីរួមគ្នាថែរក្សាសន្តិភាព ស្ថិរភាព ការអភិវឌ្ឍ និងភាពរីកចម្រើនរបស់ប្រទេសជាតិឱ្យស្ថិតស្ថេរជានិច្ច»។
ជាកិច្ចបញ្ចប់ ពិធីប្រកាសកែសម្រួល និងបំពេញបន្ថែមសមាសភាពក្រុមការងារគណបក្សចុះមូលដ្ឋានឃុំព្រាល បានប្រព្រឹត្តទៅដោយជោគជ័យ ក្នុងបរិយាកាសសាមគ្គីភាព ភាពកក់ក្តៅ និងការប្តេជ្ញាចិត្តខ្ពស់។ ក្រុមការងារគ្រប់លំដាប់ថ្នាក់ទាំងអស់បានបង្ហាញឆន្ទៈរួមគ្នា បន្តចុះជាប់ជាមួយប្រជាពលរដ្ឋ ស្តាប់ និងដោះស្រាយបញ្ហាប្រឈមនៅមូលដ្ឋានឱ្យបានទាន់ពេលវេលា ព្រមទាំងរួមចំណែកពង្រឹងជំនឿទុកចិត្តរបស់ប្រជាពលរដ្ឋចំពោះគណបក្សប្រជាជនកម្ពុជា ឱ្យកាន់តែរឹងមាំ និងមានប្រសិទ្ធភាព៕ដោយ៖ សិរី នាគ
