ខេត្តកណ្តាល៖ ជនសង្ស័យម្នាក់ដែលសមត្ថកិច្ចឃាត់ខ្លួនក្នុងករណីទទួលផលចោរកម្មម៉ូតូ ត្រូវបានកម្លាំងជំនាញបន្តឆែកឆេរផ្ទះប្រទះឃើញថ្នាំញៀន១កញ្ចប់ធំ និងឧបករណ៍ប្រើប្រាស់ជាច្រើនទៀត។ ប្រតិបត្តិការនេះបានធ្វើឡើងកាលពីថ្ងៃទី៣១ មករា ២០២៦ វេលាម៉ោង ១២និង០០នាទី នៅចំណុចភូមិចំបក់ត្រប់ ឃុំព្រែករកា ស្រុកកណ្តាលស្ទឹង ខេត្តកណ្តាល។
ប្រភពពីសមត្ថកិច្ចបានឲ្យដឹងថា ជនសង្ស័យឈ្មោះ រី រ៉ូ ភេទប្រុស អាយុ២៤ឆ្នាំ រស់នៅភូមិកោះគ ឃុំរកាខ្ពស់ ក្រុងតាខ្មៅ ខេត្តកណ្ដាល មុខរបរមិនពិតប្រាកដ (មានសារធាតុញៀនក្នុងទឹកនោម)។ វត្ថុតាងដែលដកហូតបានរួមមាន ម្សៅក្រាមសថ្លា ១កញ្ចប់ធំ (ទម្ងន់ ២៤,៥៥ ក្រាម), ថ្នាំញៀនប្រភេទ WY ២គ្រាប់ (ពណ៌ផ្កាឈូក), ជញ្ជីងថ្លឹងគ្រឿងញៀន ១គ្រឿង, ទូរស័ព្ទដៃ៣គ្រឿង,សំបកឡតគ្រាប់កាំភ្លើងខ្លី១គ្រាប់ និងសម្ភារវេចខ្ចប់មួយចំនួន។
ប្រភពបន្តថា ដើមឡើយនៅថ្ងៃទី៣០ មករា ២០២៦ វេលាម៉ោង ២១និង១០នាទី កម្លាំងប៉ុស្តិ៍នគរបាលរដ្ឋបាលព្រែករកា សហការជាមួយកម្លាំងជំនាញបានឃាត់ខ្លួនជនសង្ស័យខាងលើនៅផ្ទះរបស់គេ ដោយសង្ស័យពាក់ព័ន្ធករណីទទួលផលចោរកម្ម (ទិញម៉ូតូ CRF ពីឈ្មោះ ទីណូ)។ លុះដល់ព្រឹកថ្ងៃទី៣១ មករា ២០២៦ វេលាម៉ោង ៩និង៣០នាទី សមត្ថកិច្ចបានសុំគោលការណ៍ពីតំណាងអយ្យការដើម្បីឆែកឆេរផ្ទះជនសង្ស័យស្វែងរកវត្ថុតាងបន្ថែម ក៏ប្រទះឃើញថ្នាំញៀនលាក់ទុកលើទូឈើដាក់ខោអាវតែម្ដង។
នៅចំពោះមុខសមត្ថកិច្ច ជនសង្ស័យបានសារភាពថា ថ្នាំញៀនមួយកញ្ចប់ធំនេះពិតជារបស់ខ្លួនប្រាកដមែន ដោយទិញមកពីឈ្មោះ គៀង នៅភូមិព្រែកស្លែង ក្នុងតម្លៃ៦០ម៉ឺនរៀល។ ជនសង្ស័យបានអះអាងថា ខ្លួនរកស៊ីតែជួញដូរនិងប្រើប្រាស់គ្រឿងញៀនប៉ុណ្ណោះ មិនដែលធ្វើសកម្មភាពលួចឆក់ប្លន់នោះទេ។
បច្ចុប្បន្ន ជនសង្ស័យព្រមទាំងវត្ថុតាង ត្រូវបានកសាងសំណុំរឿងបញ្ជូនទៅកាន់អធិការដ្ឋាននគរបាលស្រុកកណ្ដាលស្ទឹងដើម្បីចាត់ការតាមនីតិវិធីច្បាប់៕
