(កណ្ដាល)៖ នៅព្រឹកថ្ងៃព្រហស្បតិ៍ ទី៦ ខែសីហា ឆ្នាំ២០២៦ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល ដោយអនុវត្តតាមបទបញ្ជាចង្អុលដឹកនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានដឹកនាំសហការីចុះត្រួតពិនិត្យស្ថានភាពប៉ុស្តិ៍នគរបាលរដ្ឋបាល និងសំណេះសំណាលសួរសុខទុក្ខកងកម្លាំងនគរបាលនៅប៉ុស្តិ៍នគរបាលរដ្ឋបាលចំនួន២ នៃស្រុកកៀនស្វាយ ដែលស្ថិតនៅប៉ែកខាងកើតទន្លេបាសាក់ រួមមាន ប៉ុស្តិ៍នគរបាលរដ្ឋបាលឈើទាល និងប៉ុស្តិ៍នគរបាលរដ្ឋបាលកំពង់ស្វាយ។
ក្នុងឱកាសនោះ លោកស្នងការបានធ្វើការណែនាំដល់កងកម្លាំងនគរបាលនៅតាមប៉ុស្តិ៍ទាំងពីរ ឱ្យបន្តពង្រឹងវិន័យ ការគ្រប់គ្រង និងប្រសិទ្ធភាពការងារជាប្រចាំ ដោយផ្តោតលើការរៀបចំប៉ុស្តិ៍ឱ្យមានសោភ័ណភាព បរិស្ថានស្អាត អនាម័យល្អ ទាំងកន្លែងធ្វើការ និងកន្លែងស្នាក់នៅ ព្រមទាំងត្រូវគ្រប់គ្រងកម្លាំងឱ្យបានច្បាស់លាស់ តាមរយៈបញ្ជីវត្តមានប្រចាំខែ។
ជាមួយគ្នានេះ លោកក៏បានណែនាំឱ្យយកចិត្តទុកដាក់លើការគ្រប់គ្រង និងថែរក្សាភស្តុភារ អាវុធ មធ្យោបាយ សម្ភារៈប្រតិបត្តិការ និងអគារស្នាក់ការ ឱ្យមានសុវត្ថិភាព និងប្រើប្រាស់ប្រកបដោយប្រសិទ្ធភាព។ ទន្ទឹមនឹងនោះ ត្រូវពង្រឹងការងារសន្តិសុខ សណ្តាប់ធ្នាប់សាធារណៈ ការផ្តល់សេវាសាធារណៈជូនប្រជាពលរដ្ឋ ការគ្រប់គ្រងមុខសញ្ញាបទល្មើសគ្រប់ប្រភេទ ការធ្វើបញ្ជីមុខសញ្ញា និងការគ្រប់គ្រងស្ថិតិប្រជាពលរដ្ឋ ការចុះបញ្ជីស្នាក់នៅ រួមទាំងការគ្រប់គ្រងការស្នាក់នៅរបស់ជនបរទេសឱ្យបានត្រឹមត្រូវតាមនីតិវិធី។
លោកឧត្តមសេនីយ៍ទោ ឈឿន សុចិត្ត ក៏បានស្តាប់សំណូមពរ និងបញ្ហាប្រឈមនានារបស់ប៉ុស្តិ៍នគរបាលរដ្ឋបាលទាំងពីរ ដើម្បីយកទៅសិក្សា ដកបទពិសោធន៍ និងស្វែងរកដំណោះស្រាយសមស្រប សំដៅពង្រឹងគុណភាពការងារ និងបង្កើនប្រសិទ្ធភាពក្នុងការបម្រើប្រជាពលរដ្ឋឱ្យកាន់តែល្អប្រសើរឡើង៕ដោយ៖ សិរី នាគ
