ខេត្តកណ្ដាល៖ សំណង់បន្ទប់ជួលចំនួន ៣ បន្ទប់ កំពុងបន្តសាងសង់យ៉ាងសកម្មលើប្រព័ន្ធលូ និងចិញ្ចើមផ្លូវសាធារណៈ ស្ថិតក្នុងភូមិព្រៃបឹង ឃុំបែកចាន ស្រុកអង្គស្នួល ខេត្តកណ្ដាល ដោយម្ចាស់ការដ្ឋានផ្ទាល់ត្រូវបានគេស្គាល់ថាគឺ លោក ស៊ិន សំអាង មេឃុំបែកចាន។ ករណីនេះបាននិងកំពុងបង្កអោយបាត់បង់សណ្ដាប់ធ្នាប់សាធារណៈ និងត្រូវបានសាធារណជនចាត់ទុកថាជាការបំពានយ៉ាងចំហលើសេចក្ដីជូនដំណឹងរបស់រដ្ឋបាលខេត្តកណ្ដាល។
បើទោះបីជាមានការរិះគន់ពីសំណាក់ប្រជាពលរដ្ឋយ៉ាងណាក៏ដោយ លោក ស៊ិន សំអាង មេឃុំបែកចាន បានបញ្ជាក់អះអាងយ៉ាងច្បាស់ៗប្រាប់ក្រុមអ្នកសារព័ត៌មានថា លោកធ្វើនៅលើដីដែលមានប្លង់កម្មសិទ្ធិត្រឹមត្រូវ និងបានអះអាងបន្ថែមថា៖ «ខ្ញុំមិនសុំច្បាប់នរណាទេ» ដោយលោកបានបន្ថែមថា បើរដ្ឋត្រូវការពេលណាលោកនឹងឈូសឆាយពេលនោះវិញ។ លោកក៏បានសារភាពផងដែរថា លោកបានដឹងពីសេចក្តីជូនដំណឹងរបស់រដ្ឋបាលខេត្ត ប៉ុន្តែលោកយល់ថាការសាងសង់នេះធ្វើឡើងលើទីតាំងដីកម្មសិទ្ធិរបស់ខ្លួន។
ជុំវិញបញ្ហានេះ មន្ត្រីជំនាញ និងស្ថាប័នពាក់ព័ន្ធបានក្រើនរំលឹកថា ទោះបីជាបុគ្គលមានប្លង់កម្មសិទ្ធិលើដីឯកជនក៏ដោយ ក៏ការរំលោភបំពានលើចំណីផ្លូវសាធារណៈ ប្រព័ន្ធលូ ឬការសាងសង់ដោយគ្មានលិខិតអនុញ្ញាតសាងសង់ពីអាជ្ញាធរមានសមត្ថកិច្ច គឺជារឿងខុសច្បាប់ស្រឡះ។
គួររំលឹកផងដែរថា កាលពីថ្ងៃទី ២០ ខែមីនា ឆ្នាំ ២០២៦ រដ្ឋបាលខេត្តកណ្ដាល បានចេញលិខិតជូនដំណឹងយ៉ាងហ្មត់ចត់រួចមកហើយ ស្ដីពីការហាមឃាត់ ការទប់ស្កាត់ការសាងសង់សំណង់ ការលក់ដូរ និងការរុះរើសំណង់នៅលើចំណីផ្លូវសាធារណៈក្នុងភូមិសាស្ត្រខេត្តកណ្ដាល ដើម្បីធានាដល់សោភ័ណភាព សណ្ដាប់ធ្នាប់ និងការរំដោះចរន្តទឹកជំនន់ទឹកភ្លៀង។ ប៉ុន្តែទង្វើរបស់លោកមេឃុំបែកចានហាក់បីដូចជាផ្ទុយស្រឡះពីស្មារតីនៃសេចក្តីជូនដំណឹងនេះទៅវិញ។
ករណីនេះ សាធារណជន និងអ្នកតាមដានការអភិវឌ្ឍសង្គម កំពុងរង់ចាំមើលចំណាត់ការ និងការឆ្លើយតបពីសំណាក់ លោក នូ សុវណ្ណារិទ្ធ អភិបាលស្រុកអង្គស្នួល ព្រមទាំង ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល ថាតើនឹងមានវិធានការផ្លូវច្បាប់ ឬ យ៉ាងណាដែរ បន្ទាប់ពីមន្ត្រីមូលដ្ឋានក្រោមឱវាទខ្លួន បង្ហាញភាពហ៊ានប្រឈម នឹងច្បាប់បែបនេះ?៕ដោយ៖ សិរី នាគ
( រូបភាពឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល ដកស្រង់ពីបណ្តាញសង្គម )
( រូបភាពលោក នូ សុវណ្ណារិទ្ធ អភិបាលស្រុកអង្គស្នួលដកស្រង់ពីបណ្តាញសង្គម )
