ភ្នំពេញ ៖ អ្នកបើកបរខុសច្បាប់ត្រូវតែទទួលទណ្ឌកម្ម រួមទាំងផាកពិន័យ ចំណែកមន្ត្រីល្មើសច្បាប់ និងគ្មានក្រមសីលធម៌ ក៏ត្រូវតែអនុវត្តតាមវិន័យនគរបាលជាតិ និងទទួលខុសត្រូវតាមផ្លូវច្បាប់ដូចគ្នា ។ នេះបើតាមការអ្នកនាំពាក្យរដ្ឋមន្ត្រីក្រសួងមហាផ្ទៃ ។
យោងតាមសំណេររបស់លោក រ៉េន រតនៈ អ្នកនាំពាក្យ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លើបណ្តាញសង្គមនៅថ្ងៃទី៥ កុម្ភៈ ឆ្នាំ២០២៦ បានលើកឡើងថា ៖ ខ្ញុំបាទពុំវាយតម្លៃសំណេរខាងលើនេះទេ ប៉ុន្តែក្នុងនាមអ្នកនាំពាក្យ ឯកឧត្តមអភិសន្តិបណ្ឌិត ស សុខា ខ្ញុំសូមផ្ដល់ព័ត៌មាន និងទស្សនទានផ្ទាល់ខ្លួន ដូចខាងក្រោម។
អ្នកនាំពាក្យបានបញ្ជាក់ថា «ខ្ញុំសូមជម្រាបជូនថា ក្នុងសន្និបាតក្រសួងមហាផ្ទៃ នាព្រឹកថ្ងៃទី៥ ខែកុម្ភៈ នេះ ឯកឧត្តមអភិសន្តិបណ្ឌិត ស សុខា បានណែនាំយ៉ាងច្បាស់ថា ច្បាប់ចរាចរណ៍ត្រូវតែរឹតបន្តឹង អ្នកខុសច្បាប់ត្រូវតែទទួលទណ្ឌកម្ម រួមទាំងផាកពិន័យ ចំណែកមន្ត្រីល្មើសច្បាប់ និងគ្មានក្រមសីលធម៌ ក៏ត្រូវតែអនុវត្តតាមវិន័យនគរបាលជាតិ និងទទួលខុសត្រូវតាមផ្លូវច្បាប់ដូចគ្នា»។
ជាមួយគ្នានោះដែរ អ្នកនាំពាក្យក៏បានលើកឡើងថា ចំពោះខេត្តជាប់ព្រំដែនប្រទេសថៃ ការអនុវត្ត នឹងលើកលែង សម្រាប់ក្រុង ស្រុក ឬផ្លូវតាមខ្សែបន្ទាត់ព្រំដែន ។ ក្រៅពីនេះ គឺអនុវត្តដូចគ្នា ។
អ្នកនាំពាក្យក៏ សូមសាធារណជនបែងចែកឱ្យដាច់ កម្មវត្ថុនៃការអនុវត្តច្បាប់ចរាចរណ៍ គឺការពារអាយុជីវិតទ្រព្យសម្បត្តិអ្នកដំណើរ និងសណ្ដាប់ធ្នាប់សាធាណៈ ។ ចំណែក អារម្មណ៍ខឹងស្អប់ ឌឺដង ឬការមិនពេញចិត្តអនុវត្តច្បាប់ វាគឺជាឆន្ទៈនិងសេរីភាពបុគ្គល។ ចំពោះមន្ត្រីអាក្រក់ គឺជាកម្មវត្ថុនៃការស្ដីបន្ទោសពីសង្គម និងត្រូវតែមានទំនួលខុសត្រូវចំពោះអំពើរបស់ខ្លួន ។
លោកបានសង្កត់ធ្ងន់ថា សរុបមក ច្បាប់ឈរនៅខាងអាយុជីវិតប្រជាជន សុវត្ថិភាពប្រជាជន និងសណ្ដាប់ធ្នាប់សាធារណៈ ។ អ្នកអាចក្លាយជាមរណជន ឬជនរងគ្រោះរបួសពិការគ្រប់ពេល បើអ្នកមិនគោរពច្បាប់ ។ សមត្ថកិច្ចរឹតបន្តឹងឱ្យអ្នកគោរពច្បាប់ គឺជាវិធីចុងក្រោយ ដើម្បីជួយអ្នកពីគ្រោះ ថ្នាក់ ៕
